ປະທານສະພາແຫ່ງຊາດ;ວາລະຕອນເຊົ້າຂອງກອງປະຊຸມມື້ດັ່ງກ່າວນີ້ ໄດ້ພິຈາລະນາກ່ຽວກັບການຄົ້ນຄວ້ານະໂຍບາຍພິເສດ ພັດທະນາອຸດສາຫະກຳ ອຳມະຕະ ທີ່ລັດຖະບານໄດ້ນໍາສະເໜີ, ຈາກນັ້ນ, ທ່ານ ສົມມາດ ພົນເສນາ ຮອງປະທານສະພາແຫ່ງຊາດ ໄດ້ຕາງໜ້າຄະນະປະຈໍາສະພາແຫ່ງຊາດ ປະກອບຄໍາເຫັນຕໍ່ກັບການສະເໜີດັ່ງກ່າວ ໂດຍໄດ້ສະເໜີໃຫ້ລັດຖະບານ ເອົາໃຈໃສ່ 10 ບັນຫາດັ່ງນີ້:
1).ຄົ້ນຄວ້າອອກນິຕິກໍາໃຫ້ເປັນອັນລະອຽດມີຄວາມຊັດເຈນ,ຮັດກຸມແລະແທດເໝາະກັບຈຸດພິເສດຂອງນິຄົມອຸດສາຫະກໍາບົນພື້ນຖານຄວາມສອດຄ່ອງກັບນະໂຍບາຍສົ່ງເສີມພິເສດແລະນິຕິກໍາທີ່ກ່ຽວຂ້ອງ.
2).ຄົ້ນຄວ້າມີກົນໄກຄຸ້ມຄອງ,ໄລ່ລຽງແລະຈັດເກັບພາສີ,ອາກອນ,ຄ່າທໍານຽມແລະຄ່າບໍລິການຈາກຜູ້ພັດທະນາແລະຜູ້ລົງທຶນໃນນິຄົມອຸດສາຫະກໍາໃຫ້ຄົບຖ້ວນ,ຖືກຕ້ອງ,ຮັບປະກັນຄວາມໂປ່ງໃສແລະສອດຄ່ອງກັບນິຕິກໍາກ່ຽວຂ້ອງ.
3).ຊຸກຍູ້ໃຫ້ຜູ້ລົງທຶນເຂົ້າໃນນິຄົມອຸດສາຫະກໍາອໍາມະຕະນໍາທຶນເຂົ້າມາລົງທຶນໃຫ້ບັນລຸຕາມໂຕເລກຄາດໝາຍດຶງດູດການລົງທຶນ5 ຕື້ໂດລາ.
4).ຊຸກຍູ້ຜູ້ລົງທຶນມີການປະກອບສ່ວນໃນການພັດທະນາຂະແໜງອຸດສາຫະກໍາເປັນຕົ້ນອຸດສາຫະກໍາປຸງແຕ່ງຢູ່ພາຍໃນດ້ວຍການສ້າງສູນຄົ້ນຄວ້າຖ່າຍທອດຄວາມຮູ້,ເຕັກໂນໂລຊີແລະນະວັດຕະກໍາໃໝ່ເພື່ອພັດທະນາສິນຄ້າທີ່ຜະລິດຢູ່ໃນນິຄົມອຸດສາຫະກໍາໃຫ້ເປັນຜະລິດຕະພັນລາວ(Made in Laos)ທີ່ໄດ້ຮັບມາດຕະຖານສາກົນ.
5).ຊຸກຍູ້ໃຫ້ຜູ້ພັດທະນາຈັດຕັ້ງປະຕິບັດການຊົດເຊີຍ,ຈັດສັນທີ່ດິນປຸກສ້າງ, ທີ່ດິນທໍາການຜະລິດແລະອາຊີບຄົງທີ່ໃຫ້ປະຊາຊົນຜູ້ທີ່ໄດ້ຮັບຜົນກະທົບຈາກການພັດທະນາໂຄງການລວມທັງການປະກອບສ່ວນໃນການພັດທະນາຊຸມຊົນແລະທ້ອງຖິ່ນທີ່ນິຄົມອຸດສາຫະກໍາຕັ້ງຢູ່.
6).ຊຸກຍູ້ໃຫ້ຜູ້ພັດທະນາແລະຜູ້ລົງທຶນໃຫ້ບຸລິມະສິດແລະນໍາໃຊ້ແຮງງານພາຍໃນ,ຍົກລະດັບແລະພັດທະນາສີມືແຮງງານໃນການນໍາໃຊ້ເຕັກໂນໂລຊີໃຫ້ແຮງງານດັ່ງກ່າວຮັບປະກັນທັງປະລິມານແລະຄຸນນະພາບໃນການສະໜອງຕາມຄວາມຕ້ອງການຂອງຕະຫຼາດແຮງງານພາຍໃນ.
7).ມີກົນໄກການບໍລິການປະຕູດຽວຮັບປະກັນໃຫ້ມີຄວາມສະດວກ, ວ່ອງໄວ, ໂປ່ງໃສແລະກວດສອບໄດ້;
8).ມີກົນໄກການປະສານງານໃນການຄຸ້ມຄອງນິຄົມອຸດສາຫະກໍາລະຫວ່າງສູນກາງແລະທ້ອງຖິ່ນ,ຂະແໜງການສູນກາງແລະທ້ອງຖິ່ນດ້ວຍກັນໃຫ້ມີຄວາມໂລ່ງລ່ຽນ, ມີປະສິດທິພາບແລະມີປະສິດທິຜົນ.
9).ມີກົນໄກຕິດຕາມ, ກວດກາແລະປະເມີນຜົນການເຄື່ອນໄຫວລົງທຶນພັດທະນານິຄົມອຸດສາຫະກໍາໃນທຸກໆປີແລະ7ປີທໍາອິດ,ແລ້ວສະຫຼຸບລາຍງານຜົນການປະເມີນດັ່ງກ່າວຕໍ່ຄະນະປະຈໍາສະພາແຫ່ງຊາດເພື່ອພິຈາລະນາ.
10).ຊຸກຍູ້ໃຫ້ຜູ້ພັດທະນາແລະຜູ້ລົງທຶນໃຫ້ການຮ່ວມມືແລະປະກອບສ່ວນເຂົ້າໃນວຽກງານປ້ອງກັນຄວາມສະຫງົບ, ຄວາມປອດໄພແລະຄວາມເປັນລະບຽບຮຽບຮ້ອຍພາຍໃນນິຄົມອຸດສາຫະກໍາ.
ທັງໝົດນັ້ນແມ່ນບາງຄວາມເຫັນແລະຂໍ້ສະເໜີຂອງຄະນະປະຈໍາສະພາແຫ່ງຊາດຕໍ່ກັບການສະເໜີນະໂຍບາຍສົ່ງເສີມພິເສດພັດທະນານິຄົມອຸດສາຫະກໍາໂດຍລວມ, ໂດຍສະເພາະການພັດທະນານິຄົມອຸດສາຫະກໍາອໍາມະຕະເພື່ອໃຫ້ກອງປະຊຸມພິຈາລະນາແລະມີຄໍາເຫັນ.
(ຂ່າວ: ສຸກສະຫວັນ, ພາບ: ຕຸໄລເພັດ)
ຄໍາເຫັນ